Ащы кеспені газдалған және энергетикалық сусынмен ішкен ер адам өлім аузынан қалды

Ащы кеспені газдалған және энергетикалық сусынмен ішкен ер адам өлім аузынан қалды

Петропавлда ащы кеспе жеп, артынан газдалған және энергетикалық сусын ішкен ер адам өте ауыр жағдайда жансақтау бөліміне түсті, деп хабарлайды Tengri Health.

Көпбейінді қалалық жедел медициналық жәрдем ауруханасының мәліметінше, ер адам медициналық мекемеге панкреатиттің асқынуымен түскен.

"Пациент бұған дейін де осындай ұстамалар болғанын, бірақ мұндай қатты ауырсынуды бірінші рет сезінгенін айтты. Ол оқиға қарсаңында диетаны бұзып, ащы кеспе жеп, газдалған және энергетикалық сусын ішкен. Түнде іші қатты ауыра бастаған. Таңға дейін шыдауға тырысқан, бірақ кейін жедел жәрдем шақырған", - деп хабарлады аурухананың баспасөз қызметі.

Бастапқыда пациент хирургия бөліміне жатқызылды, алайда жағдайы тез нашарлап, шұғыл ота жасау қажет болған.

"Отадан кейін пациент жансақтау бөліміне ауыстырылды. Кейінірек тыныс алуындағы күрделі мәселелерге байланысты ол жасанды тыныс алу аппаратына қосылды. 12 күн бойы жансақтау бөлімінің дәрігерлері мен медициналық қызметкерлері пациенттің жағдайын тұрақтандыру үшін қолдан келгеннің бәрін жасап, өмірі үшін күресті", - деп мәлімдеді ауруханадағылар.

Ер адамның айтуынша, ол алғашқы уақытта айналасында не болып жатқанын түсінбейтіндей халде болған. Біртіндеп жағдайы жақсарып, беті бері қараған.

"20 күндік емнен кейін пациент үйіне тұрақты қанағаттанарлық жағдайда жіберіледі. Ауруханадан шығар алдында ер адам осы уақыт бойы қасында болып, қиын кезеңнен өтуге көмектескен медицина қызметкерлеріне жеке алғысын білдіргісі келді. Біздің ұжым үшін мұндай сөздер өте құнды. Бұл сөздердің артында пациенттің сенімі, бастан өткерген қиындықтар мен емнің сәтті аяқталғанына деген қуаныш тұр", - деп бөлісті Петропавл ауруханасының өкілдері.

Дәрігерлер панкреатит кезінде дәрігердің нұсқаулары мен тағайындалған диетаны қатаң сақтау маңызды екенін, сондай-ақ тамақтану режимін бұзудың салдары өте ауыр болуы мүмкін екенін ескертті.

Анықтама: Панкреатит - ұйқы безінің қабыну ауруы, бұл кезде без бөлетін ас қорыту ферменттері мүшенің ішінде белсенді болып, оның тіндерін бұза бастайды (өзін-өзі қорыту). Жедел панкреатит - тез дамитын кенеттен қабыну, ол іштің жоғарғы бөлігінде немесе сол жақ қабырға астында белдік тәрізді қатты ауырсынумен, құсумен және жалпы интоксикациямен сипатталады. Шұғыл медициналық көмекті қажет етеді.


Күніне 4 энергетикалық сусын ішкен: алматылыққа шұғыл ота қажет болды

Айта кетейік, Алматыда хирургтар асқазан ойық жарасының тесілуі және перитонитке шалдыққан жас жігітті аман алып қалды. Дәрігерлердің айтуынша, пациент бірнеше ай бойы күніне үш-төрт құты энергетикалық сусын ішіп келген.