ШҚО-да әйел ота үстеліне түскенше өміріне қауіп төніп тұрғанын сезбеген

ШҚО-да әйел ота үстеліне түскенше өміріне қауіп төніп тұрғанын сезбеген

Қазақстанның 48 жастағы тұрғыны бірнеше күн бойы ішінің төменгі тұсы қатты ауырсынып, дене қызуының көтерілгеннен кейін ақыры ауруханаға түскен. Тексеріс кезінде өміріне қауіп төндіретін және шұғыл ота жасауды қажет ететін ауыр қабыну процесі анықталды. Әйел сырқатының себебін білгенде таңғалды, деп хабарлайды Tengri Health.

Шығыс Қазақстан облыстық ауруханасының дәрігерлері өз тәжірибесіндегі осы ерекше жағдай туралы айтып берді. Қабылдау бөліміне жедел жәрдем көлігімен 48 жастағы пациент жеткізілген. Ол бірнеше күн бойы ішінің төменгі жағы қатты ауырғанына шыдап келген.

"Тексеру нәтижесінде жатырдан басталған ауыр іріңді қабыну процесі анықталды. Бұл жағдайда жалғыз шешім - шұғыл ота жасау. Ал хирургиялық араласу кезінде дәрігерлер іш қуысы толықтай іріңге толғанын көрді. Бұл сепсиске, яғни адам өміріне үлкен қауіп төндіретін жағдайға әкеп соғуы мүмкін еді", - деп хабарлады медициналық мекеменің баспасөз қызметі.

Қабыну ошағын жою үшін дәрігерлерге әйелдің жатырын алып тастауға тура келді.

"Ауыр қабынуға осыдан 12 жыл бұрын салынған жатыр ішіндегі спираль себеп болғаны анықталды. Әйелдің айтуынша, уақыт өте келе ол спираль туралы мүлдем ұмытып кеткен", - деп толықтырды облыстық аурухана өкілдері.

Дәрігерлер бұл оқиға қазақстандық әйелдерге өз денсаулығына ұқыпты қарау қаншалықты маңызды екенін тағы бір мәрте ескертуге себеп екенін атап өтті.

"Спиральді қолдану мерзімі оның түрі мен моделіне байланысты. Кейбірі төрт-бес жылға арналса, енді бірі ұзағырақ уақытқа есептелген. Оны дер кезінде ауыстыру немесе алып тастау үшін дәрігерге уақытында қаралу керек", - деді акушер-гинеколог Олжас Рахымжанов.

Сондай-ақ дәрігер әйелдерге ешқандай шағымы болмаса да, жылына кемінде бір рет гинекологқа көрініп, кіші жамбас мүшелерінің УДЗ-нен өтіп тұру қажет екенін еске салады.

Контрацепция: неге жауапкершілік көбіне әйелдерге жүктеледі?

Бұған дейін Tengri Health тілшісі Қазақстанда әйелдерге стерилизация неге ерлерге қарағанда жиі жасалатынын, бұл оталардың айырмашылығы неде екенін, кімдерге жасауға болатынын және одан кейін қайта балалы болу мүмкіндігін зерттеді. Бұған Астанадағы ерлі-зайыптының басынан өткен оқиға себеп болды: күйеуі вазэктомия жасатуға шешім қабылдағанымен, дәрігердің күтпеген реакциясына тап болған.

Жұп үлкен таңдау алдында қалды: контрацепцияның ең кең тараған әдістері - жатыр ішіндегі спираль мен аралас контрацептивтер әйеліне денсаулығына байланысты жарамайтын болып шықты, ал ерлі-зайыпты төртінші баланы жоспарламаған. Осы оқиғаның мән-жайын мына жерден оқыңыз.