Қазақша
Русский
ПОДЕЛИТЬСЯ
+7 (777) 001 44 99
Әлеуметтік желілер
eGov.kz электрондық порталында және eGov Mobile мобильдік қосымшасында шұғыл емдеуге жатқызу туралы хабарлама жіберетін жаңа тегін сервис іске қосылды. Пайдаланушы алдын ала үш сенімді тұлғаға дейін көрсете алады. Ауруханаға жатқызу тіркелген соң оларға автоматты түрде SMS жіберіледі.
Жаңа сервис қалай жұмыс істейтінін және жақындары нақты қандай мәліметтер алатынын Tengri Health тілшісі анықтады.
Сервисті пайдалану үшін қолданушы eGov.kz порталында немесе eGov Mobile қосымшасында сенімді контактілерді тіркеуі қажет. Үш адамға дейін көрсетуге болады, деп хабарлады Денсаулық сақтау министрлігінің баспасөз қызметі.
eGov.kz порталында сенімді контактіні қалай тіркеуге болады
"Көрсетілген адамға тіркеуді растау немесе одан бас тарту туралы ұсыныспен SMS келеді. Растау үшін 911 кодымен, бас тарту үшін 912 кодымен жауапты SMS жіберу қажет. Шешім қабылдауға бес сағатқа дейін уақыт беріледі", - делінген хабарламада.
Егер адам тіркеуді растаса, пайдаланушы сұранысқа қол қояды. Осыдан кейін сенімді тұлға туралы мәліметтер Денсаулық сақтау министрлігінің ақпараттық жүйесіне беріледі.
eGov Mobile қосымшасында контактіні қалай тіркеуге болады
Өтінімді Денсаулық сақтау министрлігінің ақпараттық жүйесімен өңдеу 10 минутқа дейін уақыт алады.
Денсаулық сақтау министрлігі Электрондық денсаулық сақтауды дамыту департаменті директорының орынбасары Айдар Қасенов хабарлама медицина қызметкері пациенттің ауруханаға жатқызылғаны туралы ақпаратты тіркегеннен кейін автоматты түрде жіберілетінін түсіндірді.
Осылайша, туыстарына пациенттің өзі хабарласқанын күтудің қажеті болмайды. Олар оның қай медициналық мекемеге жеткізілгенін біліп, қажет болған жағдайда өзі немесе ауруханамен байланыса алады.
Айдар Қасенов адам ауруханаға құжатсыз жеткізілген немесе өзі туралы мәлімет бере алмайтын жағдайларға жеке тоқталды.
"Егер адам есімін айта алмайтын немесе өзі туралы мәлімет бере алмайтын жағдайда болса, дәрігерлер пациенттің кім екенін анықтау үшін полицияны тарта алады", - деді спикер.
Сенімді контактіні тіркегеннен кейін оның өзекті мәртебесін eGov.kz порталындағы "Менің профилім - Жеке кабинет" бөлімінен, ал eGov Mobile қосымшасында - "Хабарламалар - Жеке кабинет тарихы" бөлімінен тексеруге болады.