Қазақстанда учаскелік дәрігерлер мен психологтардың жалақысы қанша теңгеге өседі?

2027 жылғы 1 қаңтардан бастап Қазақстанда учаскелік дәрігерлер мен орта медицина қызметкерлеріне үздіксіз еңбек өтілі үшін қосымша ақы енгізу ұсынылып отыр. Олардың көлемі қандай болатыны және дәрігерлер қанша жалақы алуы мүмкін екені туралы Tengri Health тарқатып жазады.

Үстемеақы кімдерге және қандай мөлшерде берілмек?

"Ашық НҚА" сайтында бұйрық жобасы жарияланды. Онда алғашқы медициналық-санитарлық көмек (АМСК) мамандарына, яғни емхана қызметкерлеріне берілетін үстемеақы мөлшері көрсетілген.

Медицина қызметкерлері үшін АМСК ұйымдарындағы үздіксіз еңбек өтілі үшін төленетін қосымша ақы мөлшері:

  • екі жылдан асса – лауазымдық жалақының 20 пайызы;
  • үш жылдан асса – лауазымдық жалақының 30 пайызы;
  • бес жылдан асса – лауазымдық жалақының 50 пайызы.

Медицина қызметкерлеріне дәрігерлер (учаскелік терапевт, учаскелік педиатр, жалпы практика дәрігері) және орта медицина қызметкерлері (учаскелік медбике, жалпы практика медбикесі, фельдшер, акушер, патронаждық медбике, мектеп медбикесі) жатады.

Халыққа тікелей қолдау көрсетуге қатысатын алғашқы медициналық-санитарлық көмек ұйымдарының медициналық емес қызметкерлері үшін психоэмоционалдық және физикалық жүктеме үшін қосымша ақы қарастырылған:

  • психологтарға – базалық лауазымдық жалақының 300 пайызы мөлшерінде;
  • әлеуметтік қызметкерлерге – базалық лауазымдық жалақының 200 пайызы мөлшерінде.

Учаскелік дәрігерлердің жалақысы қанша болуы мүмкін?

Бұған дейін Денсаулық сақтау министрлігінің баспасөз қызметі үстемеақы енгізілгеннен кейін ең жоғары жалақыны ауылдық жерлерде жұмыс істейтін, еңбек өтілі максималды деңгейдегі жалпы практика дәрігерлері ала алатынын хабарлады.

Денсаулық сақтау министрлігінің мәліметінше, олардың жалақысы қосымша ақыны есепке алғанда 534 мыңнан 760 мың теңгеге дейін өсуі мүмкін.

Ауылдық жерлердегі орта медицина қызметкерлері де табысының артуына үміт арта алады. Еңбек өтілі жоғары мамандардың жалақысы 284 мыңнан 401 мың теңгеге дейін көтерілуі мүмкін екені Денсаулық сақтау министрлігінің баспасөз қызметі таратқан хабарламада айтылған.

Үстемеақылар еңбек өтілі аз медицина қызметкерлеріне де беріледі. Мәселен, ауылдағы жалпы практикалық дәрігердің жалақысы 386 мың теңгеден 450 мың теңгеге дейін артуы мүмкін.

Орта медициналық персонал үшін бұл көрсеткіш 221 мың теңгеден 256 мың теңгеге дейін өседі деп болжанады.

Қалаларда жалақы қалай өзгереді?

Қалалардағы учаскелік медицина қызметкерлерінің де жалақысын көтеру жоспарланып отыр.

Министрліктің есептеуінше, еңбек өтілі максималды деңгейдегі жалпы практика дәрігері қазіргі 425 мыңның орнына 607 мың теңгеге дейін ала алады. Осындай өтілі бар орта медицина қызметкерінің жалақысы 224 мыңнан 318 мың теңгеге дейін өсуі мүмкін.

Еңбек өтілі аз мамандар үшін де қосымша төлемдер қарастырылған. Жалпы практикалық дәрігер 307 мыңның орнына 358 мың теңгеге дейін алса, орта медициналық персоналдың жалақысы 173 мыңнан 202 мың теңгеге дейін өсуі мүмкін.

АМСК учаскелік қызметінің медицина қызметкерлеріне, сондай-ақ учаскелік қызмет психологтары мен әлеуметтік қызметкерлеріне жалақы 2027 жылғы 1 қаңтардан бастап көтеріледі деп жоспарланып отыр.

Пікірлер

Жаңалықтар