Бір ауруханада 62 жыл еңбек етті
Лариса Лаврик Қостанай қалалық онкологиялық көпбейінді ауруханасында 62 жыл бойы еңбек етіп, 87 жасында құрметті демалысқа шықты. Ол 35 жыл бойы өңірлік патологоанатомия зертханасын басқарды.
Клиника әлеуметтік желіде жариялаған кадрлардан әріптестері дәрігерді зейнетке шығарып салу үшін аурухана дәлізіне жиналғаны көрінеді. Қошемет көрсетіп, гүл шоғын сыйлап, ақжарма тілегін білдірген ұжым оған естелік сыйлықтар мен грамоталар табыс етті.
Қостанай онкологиясының аңызы
Әріптестері Лаврикті осы мекеменің аңыз адамы деп атайды. Ол 1984 жылдан 2019 жылға дейін патологоанатомия зертханасының меңгерушісі болды. Осы уақыт ішінде зертхана жұмысын ұйымдастырып, оны заманауи жабдықтармен және реактивтермен қамтамасыз етуге атсалысты, сондай-ақ, диагнозды тез әрі дәл қоюға көмектесетін жаңа зерттеу әдістерін енгізді.
Дәрігерлер Лариса Григорьевна кәсіби жолында көптеген шәкірт тәрбиелегенін де айтты. Бүгінде олар Қазақстанда, Ресейде және басқа да елдерде еңбек етіп жүр.
"Мұндай жандар - ұжымымыздың нағыз мақтанышы, олар - кәсібилік пен адамгершіліктің, таңдаған жолына адалдықтың үлгісі. Оның еңбегі, даналығы мен мейірімі онкологиялық қызмет тарихында мәңгі қалады", - деді ұжым мүшелері.