Премьер-министр тиімсіз дәрі-дәрмектерге қатысты шағымдарды қадағалауды тапсырды

Премьер-министр тиімсіз дәрі-дәрмектерге қатысты шағымдарды қадағалауды тапсырды

Премьер-министр Олжас Бектенов қазақстандықтардың дәрі-дәрмектің жанама әсерлері мен тиімсіздігіне қатысты шағымдарын қадағалауды тапсырды. Бұл туралы ол Үкімет отырысында мәлімдеді, деп хабарлайды Tengri Health.

Тиімсіз дәрі-дәрмектер туралы

Бектенов 2027 жылғы 1 қаңтардан бастап дәрілік заттар мен медициналық бұйымдардың айналымы саласындағы қадағалау өкілеттіктері кеңейетінін еске салды.

"Дәрі-дәрмектің сапасы мен қауіпсіздігі мәселелерінің маңызы зор. Кейбір препараттардың тиімділігінің төмендігі мен жанама әсерлері туралы азаматтардың шағымдары үнемі қадағалануы тиіс", – деп атап өтті премьер-министр.

Созылмалы ауруы бар емделушілерге арналған тегін дәрі-дәрмектер

Олжас Бектенов тегін дәрі-дәрмекпен қамтамасыз ету жүйесіне де ерекше тоқталды. Оның айтуынша, бірінші кезекте үздіксіз емдеуді қажет ететін созылмалы аурулары бар адамдарды препараттармен қамтамасыз ету қажет.

"Дәрі-дәрмек алудың түсінікті әрі ыңғайлы тәртібін қамтамасыз ету керек. Әрбір емделуші қандай препараттар тегін берілетінін, оларды қайдан және қашан алуға болатынын, қиындықтар туындаған жағдайда немесе үйреншікті дәрі басқа өндірушінің препаратына ауыстырылған кезде қайда жүгіну керектігін білуі тиіс. Ауыстыру себептері мен қолдану тәртібін қолжетімді түрде түсіндіру қажет", – деді ол.

Оның сөзінше, ұзақ емделуді қажет ететін балалардың ата-аналары үшін дәрі-дәрмек алуды жеңілдету өте маңызды. Олар ақпараттың жетіспеушілігінен немесе артық бюрократиялық рәсімдерден қиындық көрмеуі тиіс.

Бұған дейін 27 қазаннан бастап Қазақстанда кейбір дәрілік препараттарды арнайы бақылаудан шығару тәртібі өзгеретінін жазған болатынбыз. Әңгіме құрамында есірткі және психотроптық заттардың, сондай-ақ прекурсорлардың аз мөлшері бар дәрілер туралы болып отыр. Бұл туралы толығырақ осы жерден оқи аласыз.