Қазақстанда пациенттер емханалардың рейтингіне әсер ете алады

Қазақстанда пациенттер емханалардың рейтингіне әсер ете алады

Қазақстанда алғашқы медициналық-санитарлық көмек (АМСК) ұйымдарының жұмысын бағалаудың бірыңғай жүйесі енгізілуде. Енді емханалардың қызметі 100 балдық шкаламен бағаланады, деп хабарлайды Tengri Health Денсаулық сақтау министрлігінің баспасөз қызметіне сілтеме жасап.

Не бағаланады?

Жаңа жүйе пациенттің медициналық көмек алуын ғана емес, сонымен қатар оны емдеу процесінің қалай өткенін де ескеретін болады.

Мәселен, пациенттің бейінді маманның кеңесін қаншалықты уақтылы алғаны, қажетті диагностикалық зерттеулерден өткені және стационардан шыққаннан кейін оның жағдайы бақылауда болған-болмағаны есепке алынады.

Осы параметрлердің барлығы алғашқы медициналық-санитарлық көмек ұйымдарының жұмысын бағалаудың бірыңғай жүйесінің құрамдас бөлігіне айналады.

Денсаулық сақтау министрлігі АМСК стандартының жаңа редакциясы медициналық көмектің қолжетімділігін арттырып, пациенттерді үздіксіз сүйемелдеуді қамтамасыз етуі тиіс екенін түсіндірді.

"Көрсеткіштерді есептеу тоқсан сайын автоматты түрде жүргізіледі. Ол үшін денсаулық сақтау саласындағы ақпараттық жүйелердің деректері қолданылады", - делінген хабарламада.

Вакцинация мен скрининг те ескеріледі

Аурулардың алдын алу мен ерте анықтауға ерекше көңіл бөлінеді.

Бағалау кезінде қанша баланың жоспарлы вакцинациямен қамтылғаны, пациенттердің скринингтен өтуі, сондай-ақ сүт безі, жатыр мойны және колоректальды қатерлі ісікке күдік туындаған жағдайда диагностиканың қаншалықты уақтылы аяқталғаны тексеріледі.

Жаңа жүйеге пациенттерден келетін кері байланыс та енгізілді.

Мониторинг барысында медициналық көмектің адам үшін қаншалықты қолжетімді әрі түсінікті болғаны, оның өз диагнозы мен алдағы емдеу жоспарын ұғынуы және көрсетілген көмектен кейін жағдайының жақсарғанын сезінуі ескеріледі.

Еске салайық, бұған дейін Құрылтай депутаты Арман Жансеңгіров бейінді дәрігерлердің қабылдауына жазылудың бірыңғай мерзімін белгілеп, күту уақытын қысқартуды ұсынды.