Қазақстанда екі танымал дәрінің тіркеуі кері қайтарып алынды

Қазақстанда екі танымал дәрінің тіркеуі кері қайтарып алынды

Қазақстанда екі дәрілік заттың тіркеу куәлігі кері қайтарып алынды. Олардың қатарында йод тапшылығының алдын алуға және емдеуге арналған препарат бар. Бұған не себеп болғанын Tengri Health тілшісі анықтады.

Қандай препараттар кері қайтарып алынды?

2026 жылғы 1 қазанда Медициналық және фармацевтикалық бақылау комитеті төрағасының міндетін атқарушы тіркеу куәліктерін кері қайтарып алу туралы екі бұйрыққа қол қойды. Сөз болып отырған препараттар:

  • "Сандостатин" - көктамырға және тері астына енгізуге арналған ерітінді, 0,05мг/мл; 0,1мг/мл; 0,5мг/мл (ампула) 1мл×5 (картон қорапша). Препарат акромегалияны (ағзада өсу гормоны тым көп бөлінетін сирек кездесетін ауру) және кейбір нейроэндокриндік ісіктерді емдеу үшін қолданылады.
  • "Йодбаланс" - 200мкг таблеткалар. Препараттың құрамында калий йодиді бар, ол йод тапшылығының алдын алу және емдеу үшін қолданылады.

Препараттар неге кері қайтарып алынды?

Комитеттегілер тіркеу куәліктері иелерінің немесе уәкілетті өкілдерінің ерікті өтініштері бойынша кері қайтарып алынғанын түсіндірді.

Тіркеу куәлігін кері қайтарып алу туралы шешім Қазақстан заңнамасында қарастырылған.

Ережеге сәйкес, денсаулық сақтау саласындағы уәкілетті орган дәрілік заттың немесе медициналық бұйымның қолданылуын, сатылуын немесе өндірісін тоқтата алады немесе тыйым сала алады, оны айналымнан алып қоя алады немесе қолданылуын шектей алады.

Бұл ретте ведомство Қазақстанға тіркеу куәлігінің қолданылу мерзімі аяқталғанға дейін әкелінген немесе өндірілген дәрілік заттар мен медициналық бұйымдарды әрі қарай қолдануға болатынын атап өтті.

Бұған дейін Қазақстанда бес дәрінің, соның ішінде диабетке қарсы препараттың тіркеуі кері қайтарып алынған болатын.