Қазақстанда 11 жастағы ұлдарды АПВ-ға қарсы вакцинациялау 2027 жылдан басталады

Фото © Tengrinews.kz / Болат Айтмолда

2027 жылдан бастап Қазақстанда пилоттық режимде 11 жастағы ұл балаларды адам папилломасы вирусына (АПВ) қарсы вакцинациялау жоспарланып отыр. Бұл туралы Қазақстанның қаржы вице-министрі Абзал Бейсенбекұлы мәлімдеді, деп хабарлайды Tengri Health тілшісі.

Денсаулық сақтау бюджетінде қанша қаражат бар?

"2027–2029 жылдарға арналған республикалық бюджет туралы" заң жобасын таныстыру барысында қаржы вице-министрі 2027 жылы денсаулық сақтау саласына 2,5 триллион теңге бөлу жоспарланғанын атап өтті.

Бұл сома тегін медициналық көмектің кепілдік берілген көлеміне (ТМККК), дәрі-дәрмекпен қамтамасыз етуге және медициналық сақтандыруға қарастырылған.

Сондай-ақ, вице-министрдің айтуынша, алғашқы медициналық-санитарлық көмектің (АМСК) міндетті әлеуметтік медициналық сақтандыру (МӘМС) жүйесіне өтуіне байланысты денсаулық сақтау саласында 453 миллиард теңге қайта бөлінді.

"МӘМС-ке мемлекеттік жарналарды есептеу кезінде пайдаланылатын медианалық жалақының өсуіне байланысты қосымша 185 миллиард теңге қарастырылған", - деп толықтырды ол.

АПВ-ға қарсы вакцинация аясы кеңейеді

Қаржыландыру профилактикалық шараларды да қамтиды.

Мәселен, 2027 жылдан бастап 11 жастағы ұл балаларды адам папилломасы вирусына қарсы вакцинациялау басталады.

Анықтама: АПВ - вирустардың 200-ден астам түрін біріктіретін топ, олардың 40-қа жуығы жыныстық жолмен берілуі мүмкін. 14 түрі онкогенді деп саналады және жатыр мойны обыры мен ісіктің басқа да түрлерін тудыруы ықтимал. АПВ-ға қарсы вакцина вирустың ең қауіпті түрлерінен қорғайды және соған байланысты онкологиялық аурулардың дамуының алдын алуға көмектеседі.

Қазақстанда адам папиллома вирусына қарсы вакцинацияь2024 жылдың қыркүйегінен бастап салына бастады. Әзірге оны тек 11–13 жас аралығындағы қыздар алып жатыр. Ол Профилактикалық егулердің ұлттық күнтізбесіне енгізілген. Вакцинация ерікті түрде жүргізіледі: егу тек ата-анасының немесе қыздардың заңды өкілдерінің рұқсатымен ғана жасалады.

Қазақстанда жаңа скрининг іске қосылады

Абзал Бейсенбекұлының айтуынша, келесі жылы Қазақстанның төрт өңірінде пилоттық режимде скринингтің жаңа түрін - өкпе обырын ерте анықтау бағдарламасын енгізу жоспарланып отыр.

Жақында барлық өңірлерде өкпе обыры туралы хабардарлық апталығы өтті. Тұрғындарға төмен дозалы компьютерлік томография арқылы бұл ауруды анықтау үшін тексеруден өту ұсынылған. Бұл - қауіп-қатер тобындағы адамдарда өкпе обырын ерте диагностикалаудың халықаралық деңгейде танылған әдісі.

Олардың қатарына мыналар жатады:

50 жастан асқан азаматтар;
темекі шегу өтілі 15 жылдан асатын адамдар;
қазіргі уақытта темекі шегетіндер және бұрын шеккендер;
шаң-тозаңның, түтіннің, химиялық және канцерогенді заттардың әсеріне ұшырайтын зиянды өндіріс қызметкерлері.

Мамандар халықтың дәл осы санаттарына тұрақты түрде профилактикалық тексеруден өтіп тұруды ұсынады.

Еске сала кетейік, Қазақстанда өкпе обыры жағдайларының шамамен 70 пайызы емдеу тиімділігі төмен болатын үшінші-төртінші кезеңдерде анықталады.

Бізді Google-дың негізгі дереккөздер тізіміне қосыңыз

Қосу

вакцина Қаржы министрлігі Денсаулық Бюджет

Қазақстанда 11 жастағы ұлдарға АПВ-ға қарсы вакцина салынады: мерзімі аталды

Денсаулық сақтау бюджетінде қанша қаражат бар?

АПВ-ға қарсы вакцинация аясы кеңейеді

Қазақстанда жаңа скрининг іске қосылады