Қазақша
Русский
ПОДЕЛИТЬСЯ
+7 (777) 001 44 99
Әлеуметтік желілер
Астанадағы емханалардың бірінің басшылары мен қызметкерлері жеті және сегіз жылға бас бостандығынан айырылды. Олар төрт жыл бойы жалған келісімшарттар арқылы кәсіпорын ақшасын ысырап жасап, оған тұрмыстық техника сатып алған және Италияға саяхат шығынын өтеген, деп хабарлайды Tengri Health.
Сот мәліметінше емхана басшысы Л. қылмыстық схемаға экономикалық жұмыс жөніндегі қызмет басшысы Р-ны, бас бухгалтер А-ны және мемлекеттік сатып алу жөніндегі менеджер Г-ны тартқан.
2021 жылдан 2025 жылға дейін олар жалған келісімшарттар негізінде кәсіпорын ақшасын аудару үшін адамдар мен компанияларды тауып отырған. Кейін бұл қаражат қолма-қол ақшаға айналдырылған.
Кейінірек схемаға басқа да тұлғалар тартылып, олардың есепшоттары медициналық ұйымның ақшасымен операция жасау үшін пайдаланылған. Сот мәліметінше, келтірілген шығын көлемі 672 753 454 теңгені құрады.
Сот емхана ақшасының жеке қажеттіліктерге жұмсалған бірнеше эпизодын анықтады.
2021–2023 жылдары сотталушылар жеке пайдалануы үшін тұрмыстық техника сатып алған. Бұған 7 073 670 теңге жұмсаған.
2023 жылдың наурызында емхана қызметкерлері медициналық мекеме есебінен Италияға жеті күндік тур ақысын төлеген. Сапар оларға 7 833 741 теңгеге түскен.
2023 жылдан 2025 жылға дейін басшы кәсіпорын қаражаты есебінен өзінің 2 179 800 теңге несиесін өтеген.
Прокурор басшы үшін пробациялық бақылаумен жеті жылға бас бостандығын шектеуді сұрады. Қалғандарына — жеті жылдан бас бостандығынан айыруды және мүліктерін тәркілеуді сұрады.
Нәтижесінде барлығы Қылмыстық кодекстің 189-бабы 4-бөлігі бойынша кінәлі деп танылды, бұл бап жеті жылдан 12 жылға дейін бас бостандығынан айыру жазасын қарастырады.
Сот жазаны жеңілдететін мән-жайларды ескерді: соттылығының болмауы, жас балаларының болуы, шығынның ішінара өтелуі, екеуінің жасының ұлғайғаны.
Клиника басшысы сегіз жылға бас бостандығынан айырылды және белгілі бір лауазымдарды атқару мен белгілі бір қызметпен айналысу құқығынан өмір бойына айырылды.
Оның қарамағындағылар жеті жылдан жеті жарым жылға дейін бас бостандығынан айырылып, оларға да дәл сондай өмір бойына тыйым салынды.
Үкім 29 қыркүйекте шықты, ол әлі заңды күшіне енген жоқ.