Интерндер мен резиденттер сақтандыруға қосылды: Қазақстанда пациенттер үшін не өзгереді?

Интерндер мен резиденттер сақтандыруға қосылды: Қазақстанда пациенттер үшін не өзгереді?

Қазақстанда медицина қызметкерлерінің кәсіби жауапкершілігін сақтандыру ережелеріне өзгерістер енгізілді. Жаңашылдықтар медицина саласындағы жұмысын жаңа бастаған жас мамандарға қатысты. Олар үшін не өзгеретіні және бұл пациенттерге қалай әсер ететіні туралы Tengri Health материалынан оқыңыз.

Дәрігерлерді сақтандыру ережелерінде не өзгереді?

Қазақстанның Денсаулық сақтау министрі медицина қызметкерлерінің кәсіби жауапкершілігін сақтандыру ережелерін өзгерту туралы бұйрыққа қол қойды.

2024 жылдың қазанынан бастап медициналық клиникалар пациенттерді емдеумен айналысатын барлық қызметкерді сақтандыруға міндетті. Олар әрбір дәрігер, мейіргер немесе фельдшер үшін Бірыңғай сақтандыру пулына белгілі бір мөлшерде жарна аударады.

Анықтама: Қазақстандағы Бірыңғай сақтандыру пулы - бұл медицина қызметкерлерінің кәсіби жауапкершілігін бірлесіп сақтандыратын және қаржылық тәуекелдерді өзара бөлісетін компаниялар бірлестігі.

Жарна мөлшері тәуекел дәрежесіне байланысты: ауруханалар хирургтар, анестезиологтар немесе акушер-гинекологтар үшін көбірек төлейді. Ал медбикелер немесе, айталық, жалпы практикалық дәрігерлер үшін төлем мөлшері азырақ.

Басты өзгеріс – енді бұл талап резидентура мен интернатура дәрігерлеріне де қолданылады. Олар ережелер мен үлгілік шартқа тікелей қосылды. Яғни, олар тіркелген медициналық ұйымдар интерндер мен резиденттерді сақтандырылғандар тізіміне енгізуі тиіс.

Бұл ретте олардың сақтандырылуы үшін бөлек төлем жасаудың қажеті жоқ. Ол клиниканың Бірыңғай сақтандыру пулына бұған дейін аударған жарналары есебінен өтеледі.

Пациенттер үшін бұл медициналық көмек көрсеткен интерн немесе резидент денсаулығына зиян келтірген жағдайда, сақтандыру өтемақысын алуға мүмкіндік береді.

Пациентке немесе оның отбасына қанша төленуі мүмкін?

Еске сала кетейік, бұйрыққа сәйкес, сақтандыру төлемінің мөлшері пациенттің денсаулығына келтірілген зардаптың ауырлығына байланысты. Болашақта бұл сомалар қайта қаралуы мүмкін, бірақ әзірге өзгеріссіз қалды.

Егер медициналық көмек көрсету нәтижесінде пациентке мүгедектік тағайындалса, келесі сомалар қарастырылған:

  • үшінші топтағы мүгедектікке - 500 АЕК немесе 2 162 500 теңге;
  • екінші топтағы мүгедектікке - 600 АЕК немесе 2 595 000 теңге;
  • бірінші топтағы мүгедектікке - 800 АЕК немесе 3 460 000 теңге;
  • мүгедектігі бар балаға - 500 АЕК немесе 2 162 500 теңге.

"Медициналық қызметті жүзеге асыру нәтижесінде пациенттің өліміне әкеп соққан өмірі мен денсаулығына келтірілген зиян үшін - 3 000 АЕК (12 975 000 теңге)", - делінген құжатта.

Денсаулыққа зиян келтіріліп, бірақ мүгедектік тағайындалмаған жағдайларда, ауруға байланысты нақты шығындар өтеледі. Бұл ретте төлем 300 АЕК-тен (1 297 500 теңге) аспауы тиіс.

Тағы бір өзгеріс талаптың жоқтығы туралы келісімге қатысты. Бұған дейін мұндай құжат нысаны қарастырылғанымен, ол пациентке қашан жолдануы керек екені нақтыланбаған болатын. Енді клиника сақтандыру төлемінен кейін келісімді жіберуге міндетті.

Қай кезде пациентке сақтандыру төлемі беріледі, ал қай кезде бас тартылуы мүмкін?

Бұған дейін медициналық қызмет нәтижесінде пациенттің өмірі мен денсаулығына келтірілген зиян сақтандыру жағдайы деп танылатыны туралы жазған едік. Бұл фактіні тәуелсіз сараптама комиссиясы анықтайды. Егер пациент немесе медицина қызметкері оның шешімімен келіспесе, мәселені сот тәртібімен шешуге болады.

Сақтандырушы оқиға туралы хабарлап, қажетті құжаттарды ұсынуға міндетті. Егер құжаттар жеткіліксіз болса немесе төлем туралы талап негізсіз болса, сақтандыру пулының әкімшісі өтемақы төлеуден бас тартуға құқылы.

Өтемақы қаншалықты тез төленуі тиіс?

Мәліметтерге сәйкес, егер пациент немесе оның заңды өкілі зиянды өтеуді талап етсе, медициналық ұйым үш жұмыс күні ішінде сақтандыру пулының әкімшісіне хабарлауы тиіс.

Төлем туралы шешім қабылданғаннан кейін ақша 10 жұмыс күні ішінде аударылуы керек. Егер құжаттар толық болмаса, пул әкімшісі бұл туралы екі жұмыс күні ішінде клиникаға хабарлауға міндеттелді.

Тараптардың жосықсыз әрекеттеріне күдік туындаған жағдайда, төлем 30 күнтізбелік күнге дейін тоқтатылуы мүмкін. Осы уақыт ішінде сақтандырушы не өтемақыны төлеуі, не дәлелді бас тарту хатын жолдауы тиіс.

Мерзімі өткен жағдайда Ұлттық банктің базалық мөлшерлемесі негізінде есептелген тұрақсыздық айыбы қарастырылған.

Тиісті бұйрық 2026 жылғы 23 қазаннан бастап қолданысқа енгізіледі.

Бұған дейін Қазақстанда "Медицина қызметкерлерінің кәсіби мәртебесі мен қызметінің кепілдіктері туралы" заң жобасы әзірленіп жатқанын жазған едік.