Қазақстанда психологтың кәсіби стандарты бекітілді

Фото:depositphotos.com

Қазақстанның Еңбек және халықты әлеуметтік қорғау министрі психологтарға арналған бірыңғай кәсіби стандартты бекітті. Енді балалар жарақатымен, спортшылармен жұмыс істейтін немесе жеке кабинеттерде қабылдау жүргізетін мамандарға білімі, тәжірибесі және біліктілігі бойынша нақты талаптар қойылады, деп хабарлайды Tengri Health тілшісі.

Психологтарға қандай талаптар қойылады?

Кәсіби стандарт 2026 жылғы 2 шілдеде Қазақстанда алғаш рет "Психологиялық қызмет туралы" жеке заң қабылданғаннан кейін әзірленді.

Кәсіби стандартқа сәйкес психологтың негізгі міндеті - балалар мен жасөспірімдерге, мүгедектігі және дамуында ауытқулары бар адамдарға, сондай-ақ психологиялық көмекке жеке тәртіппен жүгінетіндерге білікті, этикалық және ғылыми негізделген көмек көрсету.

Мұндай көмекке мыналар кіреді:

психологиялық диагностика,
консультация беру,
түзету (коррекция),
оңалту және абилитация,
психологиялық мәселелердің алдын алу және ағарту жұмыстары.

Бұл талаптар кімдерге қатысты болады?

Біліктілігін растауы тиіс мамандар тізіміне мыналар кірді:

балалар психологы,
"арнайы психопедагогика" мамандығы бойынша психолог,
жеке практикадағы психолог,
спорт психологы.

Оқу, тәжірибе және курстар: мамандардан не талап етіледі?

Стандартта бейінді маманның сипаттамасы егжей-тегжейлі баяндалған. Құжатта мыналар қатаң белгіленген:

Қажетті білім деңгейі. Мысалы, жоғары білім (бакалавриат, специалитет, ординатура);
Жұмыс тәжірибесіне қойылатын талаптар. Мысалы, психология немесе психиатрия саласында жоғары және/немесе жоғары оқу орнынан кейінгі білімі болған жағдайда.
Бейресми және формалды емес біліммен байланыс. Мысалы, кәсіби қауымдастықтар мен салалық бірлестіктерде оқу;
Қызметтің негізгі мақсаты. Мысалы, балалар мен жасөспірімдердің (3 жастан 18 жасқа дейін) психологиялық амандығына, дамуына және әлеуметтік-психологиялық бейімделуіне ықпал ету.
Еңбек функциялары мен дағдыларының тізбесі. Мысалы, ата-аналарға алғашқы консультация беруді ұйымдастыру және өткізу, балалардың даму деңгейіне психологиялық диагностика жасау, алынған нәтижелерді талдау және түсіндіру.

Құжатта кәсіби стандарт психологтардың кәсіби даярлығының мазмұны мен деңгейіне, олардың біліктілігіне, құзыреттілігіне қойылатын бірыңғай талаптарды анықтау үшін қолданылатыны айтылған. Сондай-ақ оның негізінде білім беру бағдарламалары әзірленіп, психологтарды оқыту мен супервизиядан өткізу талаптары қалыптастырылады.

Бұйрық 2026 жылғы 13 қазаннан бастап қолданысқа енгізіледі.

Бұған дейін психологтар туралы жаңа заң не үшін қабылданғанын және мамандар бұл туралы не ойлайтынын егжей-тегжейлі талдаған болатынбыз.

Бізді Google-дың негізгі дереккөздер тізіміне қосыңыз

Қосу

Психолог Заң Еңбек және халықты әлеуметтік қорғау министрлігі Қазақстан

“Инстаграмдағы“ психологтар дәуірі аяқталды ма? Қазақстанда жаңа ережелер бекітілді

Психологтарға қандай талаптар қойылады?

Бұл талаптар кімдерге қатысты болады?

Оқу, тәжірибе және курстар: мамандардан не талап етіледі?