Дәріханаларда тегін дәрі-дәрмек сатылған: Денсаумин жүздеген дерек анықталғанын хабарлады

Дәріханаларда тегін дәрі-дәрмек сатылған: Денсаумин жүздеген дерек анықталғанын хабарлады

Пациенттерге тегін берілуі тиіс препараттар дәріханаларда қайта сатылған. 2024 жылы 788 субъектіден заңбұзушылықтар анықталды. Бұл туралы Үкімет отырысында денсаулық сақтау министрі Ақмарал Әлназарова мәлімдеді, деп хабарлайды TengriHealth.

Заңбұзушылықтарды цифрлық таңбалау жүйесі анықтаған. Сондай-ақ жүйе дәрі-дәрмектерді айналымнан қайта шығару және препараттарды шекті бағадан жоғары бағамен сату фактілерін тіркеген.

"Анықталған заңбұзушылықтар саны өткен жылмен салыстырғанда он есе өсті", - деді Әлназарова.

Барлық анықталған факт бойынша әкімшілік хаттамалар толтырылып, айыппұлдар салынды.

"2024 жылы енгізілген таңбалау жүйесі дәрілік заттардың қозғалысын қадағалауға, қорларды басқаруға және бағаны нақты уақыт режимінде бақылауға мүмкіндік береді", - деді министр.

Таңбалау қалай жұмыс істейді?

Дәрінің әрбір қаптамасына бірегей код қойылады. Жүйе препараттың қозғалысын қадағалайды және пациентке тегін беруге арналған дәрі бөлшек саудаға түскен жағдайда оны көрсете алады.

Бұған дейін Tengri Health екі жыл ішінде жүйе тегін дәрі-дәрмектерді қайта сатудың 25 мыңнан аса жағдайын анықтағанын хабарлаған болатын.

Қыркүйек айында кәсіпкерлердің шағымдары мен өндірушілердің тендерлерге қолжетімділік шарттарына қатысты сұрақтарынан кейін депутаттар компанияның сатып алуларын қайта тексеруді талап етті. "СҚ-Фармация" өкілдері 741 миллион теңгелік заң бұзушылықтар туралы мәлімдемеге қатысты жауап берді.