Қазақша
Русский
ПОДЕЛИТЬСЯ
+7 (777) 001 44 99
Әлеуметтік желілер
Ұлттық нейрохирургия орталығында 74 жастағы пациенттің басынан көлемі 15 сантиметр болатын үлкен ісік алынды. Дәрігерлердің айтуынша, ісік миды қысып, бас сүйегінен шығып кеткен, деп хабарлайды Tengri Health тілшісі.
Науқаста аурудың алғашқы белгілері 2019 жылы пайда болған. Ұлттық нейрохирургия орталығының ота жасаған нейрохирург дәрігері Айдос Молдабековтің айтуынша, әйел әр жылдары Алматы мен Мәскеу нейрохирургтеріне қаралып, бақылауда болу туралы кеңес алған.
"Бірақ ауру өрши берді. Пациент бізге кейінгі айда пайда болған бас сүйегінің айқын асимметриясына байланысты көмекке жүгінді", - деп түсіндірді дәрігер.
Оның сөзінше, әйел қатты бас айналуына, жалпы әлсіздікке және бастың қысып ауыруына шағымданған.
Тексеру нәтижесінде оның сол жақ маңдай-төбе-самай аймағында атипті үлкен менингиома түзілгені анықталды.
"Көлемі 12 × 14 × 15,94 сантиметр болатын ісік бас сүйегінің сыртына жайылған, бұл бас миының қатты қысылуына және оның орталық құрылымдарының ығысуына әкеп соқтырған", - деп атап өтті Ұлттық нейрохирургия орталығының баспасөз қызметі.
Тексеруден кейін және консилиумда клиникалық жағдайды егжей-тегжейлі талқылай келе, мамандар ісіктің көлемі мен оның қанмен қамтамасыз етілу ерекшеліктерін ескере отырып, емдеуді екі кезеңде жүргізу туралы шешім қабылдады.
Алдымен тамырлы нейрохирургтер Нұрсұлтан Махамбетов пен Бауыржан Құнақбаев суперселективті церебральды ангиография мен ісік тамырларын рентгенэндоваскулярлық ішінара эмболизациялауды жүргізді. Қарапайым тілмен айтқанда, мамандар ісіктің қанмен қамтамасыз етілуін ішінара бұғаттады. Бұл науқасты емдеудің келесі кезеңіне дайындауға мүмкіндік берді.
Содан кейін нейрохирург Айдос Молдабеков профессор Нұржан Рыскелдиевтің жетекшілігімен нейронавигацияны қолдана отырып, ісікті микрохирургиялық жолмен алып тастады.
"Сондай-ақ қатты ми қабығына пластика жасалды және титан пластинасын қолдану арқылы бір мезгілде краниопластика (бас сүйек ақауын қалпына келтіру бойынша хирургиялық ота) жүргізілді", - деп толықтырды Ұлттық нейрохирургия орталығының баспасөз қызметі.
Айдос Молдабековтің айтуынша, ісік тамырларын ішінара бұғаттау процедурасы 2,5 сағатқа, ал оны алып тастау тағы бес сағатқа созылған.
Қазір 74 жастағы әйел дәрігерлердің бақылауында болып, отадан кейінгі оңалтудан өтіп жатыр.
Бұған дейін бет-жақ хирургтерінің он жылдан астам уақыт бойы осы дерттен зардап шеккен әйелдің жақ асты аймағынан алып ісікті алып тастағаны туралы жазған болатынбыз.