Павлодарда дәрігерлер бір аптадан аса уақыт бойы стоматологияда тісін емдеткеннен кейін комаға түскен 3 жасар қыздың өмірін сақтап қалуға бар күшін салып жатыр. Бүлдіршіннің жағдайы өте ауыр. Павлодар облыстық денсаулық сақтау басқармасының өкілдері оқиғаның мән-жайын айтты, деп хабарлайды Tengri Health тілшісі.
Не болды?
21 қазанда стоматологиялық ем-шара кезінде үш жасар қыздың жағдайы күрт нашарлап, есінен танған. Жедел жәрдем көлігінде баланың жүрегі тоқтап қалған, ал ауруханаға жатқызылғаннан кейін бұл жағдай қайталанған. Қыз өте ауыр халде жансақтау бөліміне жеткізілді. Ол әлі күнге дейін комада жатыр.
Қазір оқиға себебін денсаулық сақтау басқармасының мамандары анықтап жатыр.
"Наркоз берілген жоқ"
Павлодар облысының бас дәрігері Ермек Күшіковтің айтуынша, баланың жағдайы стоматологияға кезекті рет барған кезде нашарлаған. Бұл жеке емханадағы стоматологтың қабылдауындағы үшінші сапары болған.
"Ем-шара кезінде ешқандай инъекция немесе жансыздандыру жасалмаған. Жағдайы нашарлауына байланысты жедел жәрдем шақырылды. Шоққа қарсы бригада келіп, баланы Павлодар облыстық балалар ауруханасына жеткізді", - деп түсіндірді Күшіков.
Оның сөзінше, қыз әлі де жасанды тыныс алу аппаратына қосылған. Павлодарлық дәрігерлер күн сайын Астанадағы Ана мен бала ұлттық ғылыми орталығы және Ұлттық кардиохирургия орталығымен телемедицина арқылы консилиум өткізіп тұрады.
Сондай-ақ облыстың бас дәрігері кішкентай пациентті Алматының бас штаттан тыс анестезиолог-реаниматологы тексергенін хабарлады. Күн сайын пәнаралық консилиумдар өткізіліп, онда емдеу шаралары түзетіліп отырады.
"Біз бұл жағдайды мұқият зерттеп жатырмыз, Денсаулық сақтау министрлігінің тапсырмасы бойынша медициналық бақылау департаменті пациент маршрутына қатысты жоспардан тыс тексеріс бастады. Сондай-ақ денсаулық сақтау басқармасы қызметтік тергеу жүргізіп жатыр. Құқық қорғау органдары стоматологиядан бейнекамера жазбаларын тәркіледі. Медицина қызметкерлерінің іс-әрекетіне немесе әрекетсіздігіне құқықтық баға беріледі", - деді Павлодар облысының бас дәрігері Ермек Күшіков.
Павлодар облысының бала құқықтары жөніндегі өңірлік уәкілі Мәдина Жұмадиева да жағдайды бақылауда ұстап отырғанын айтты.
"Бұл стоматологқа үшінші рет келуі еді, жеңіл емдеу шаралары жүргізілген: бірінші рет дәрі салынған, содан кейін уақытша пломба, сосын тұрақты пломба қойылған. 21 қазанда қыз анасымен бірге қабылдауда болған. Қабылдау аяқталғаннан кейін есінен танып қалған. Алғашқы көмек талып қалған кездегідей көрсетілген", - деді павлодарлық балалар омбудсмені.
Сондай-ақ ол баланың ата-анасы Павлодар облысы бойынша Медициналық және фармацевтикалық бақылау комитеті департаментіне жүгініп, құқық қорғау органдарына арыз жазғанын айтты.
Павлодарда 3 жасар бала тіс емдеткеннен кейін комаға түсті
Еске сала кетейік, бұған дейін баланың тісін емдеген стоматологиялық клиника барлық ем-шара медициналық хаттамаларға қатаң сәйкестікте жүргізілгенін мәлімдеген болатын. Ресми тексеріс аяқталғанға дейін қызметкерлердің кінәсі туралы кез келген қорытынды жасауды олар асығыс деп атап, жалған ақпарат тарату мен жала жабуға қатысты жауапкершілік бар екенін ескертті.
Бұл стоматологиялық емхана мемлекеттік-жекеменшік серіктестік бойынша сенімгерлік басқаруда екені және медициналық қызметтерді, оның ішінде мемлекеттік тапсырыс аясында көрсететіні хабарланған.
Астанадағы стоматологияда қаза болған үш жасар қыздың ісі: сот үкімі шықты
2024 жылғы қазанда Астанадағы жеке емханалардың бірінде үш жасар қыз наркозбен тісін емдеткеннен кейін оянбай қалған болатын. Әкесінің айтуынша, ем-шара жоспарланған үш сағаттың орнына 3,5 сағаттан аса уақытқа созылған. Сот талқылауы барысында стоматолог-дәрігер емді бірнеше кезеңге бөлмей, баланың 18 тісін бірден емдеуге шешім қабылдағаны белгілі болды.
Іс бойынша анестезиолог-дәрігер айыпталды. Прокурор сот тергеуі барысында сараптама анестезиолог пен клиника жұмысында заңбұзушылықтарды анықтағанын айтты.
Сот айыпталушыны кәсіби міндеттерін тиісінше орындамағаны және бұл абайсызда адам өліміне әкеп соқтырғаны үшін кінәлі деп таныды. Оған 2 жылға бас бостандығынан айыру жазасы тағайындалып, 3 жыл медициналық қызметпен айналысуға тыйым салынды. Бұл ретте сот Конституцияның 30 жылдығы аясында жарияланған рақымшылық туралы заңға сәйкес, айыпталушыны амнистия бойынша негізгі жазадан босатты.
