Шығыс Қазақстан облысында дәрігерлер ерекше екі оқиға туралы айтып берді: бір емделушінің алып жатыр миомасы астында жіті аппендицит жасырынса, екіншісінен үлкен қарбыздың көлеміндей кистома анықталған. Екі әйел де облыстық ауруханаға іші қатты ісінген күйде түскен, деп хабарлайды Tengri Health.
Оқиғаның бірі қазанның басында ШҚО-да болған. Ауыл тұрғыны іші қатты ауырғанына байланысты медициналық көмекке жүгінген. Ол Өскеменге іш қуысында ірі ісік бар екенін көрсеткен компьютерлік томография нәтижелерімен келген.
"Ісіктің көлемі расында таңғаларлық болды - іші жүктіліктің соңғы айларындағыдай көрінетін. Әйелдің өзі мұны тез салмақ қостым деп ойлаған", - деп хабарлады Шығыс Қазақстан облыстық ауруханасы.
Фото: Шығыс Қазақстан облыстық ауруханасының баспасөз қызметі
Қосымша тексеру емделушіде жатыр миомасы бар екенін көрсетті. Алайда ауырсыну сипаты бұл аурудың белгілеріне сәйкес келмеген.
Дәрігер Юлия Якушеваның айтуынша, мамандар басқа патология бар деп күдіктеніп, отаны абдоминалдық хирургтармен бірлесіп жасауды ұйғарған.
Ота кезінде алып миоманың артында жіті аппендициттің де болғаны анықталды. Соқыр ішек өсіндісі айналасындағы тіндердің арасында "көміліп" қалған. Отадан кейін әйел тез оңалып, стационардан шығарылды.
Бұл Шығыс Қазақстан дәрігерлерінің тәжірибесіндегі жалғыз жағдай емес. Бұған дейін облыстық ауруханаға іші қатты ісінген 78 жастағы әйел түскен. Ол алты жыл бойы кіші жамбас қуысында ісік барын білгені, бірақ ауырмағандықтан дәрігерлерге қаралмағаны белгілі болды.
Ота барысында дәрігерлер көлемі үлкен қарбызбен тең келетін алып, тығыз кистоманы анықтады.
"Іштің біртіндеп үлкеюі әрдайым салмақ қосумен немесе жасқа байланысты өзгерістермен байланысты емес. Ісік ұзақ уақыт бойы ауырмаса да, бұл оның қауіпсіз екенін білдірмейді. Ерекше өзгерістер мен жайсыздық пайда болғанда, дәрігерге уақытында қаралу керек", - деп кеңес береді медициналық мекеме қызметкерлері.
Скринингтен өту маңыздылығының үш себебі
Ауруды ерте сатысында анықтау. Скрининг ауруды белгілері пайда болғанға дейін - емдеу ең тиімді және толық айығып кету мүмкіндігі жоғары кезде анықтауға мүмкіндік береді.
Асқынулардың алдын алу. Ерте араласу көбінесе ауыр зардаптардың алдын алуға, еңбекке қабілеттілікті және өмір сүру сапасын сақтауға көмектеседі.
Уақыт пен қаражатты үнемдеу. Асқынған ауруды емдеу қымбатырақ, ұзағырақ және күрделірек болады. Скрининг - бұл денсаулықты үлкен шығынсыз сақтаудың қолжетімді жолы.
