Қазақстанда 80-ге жуық клиника тексерістен кейін лицензиясынан айырылды

Клиникалар не үшін лицензиясынан айырылды?

ҚР Денсаулық сақтау министрлігінің Медициналық бақылау комитеті 2026 жылғы тоғыз айдағы тексерістер қорытындысын шығарды.

Ведомство мәліметінше, тексерістен кейін комитеттің аумақтық департаменттері заңнама талаптарын бұзған медициналық мекемелерді лицензиясынан айыру туралы талаппен сотқа жүгінген.

Нәтижесінде 78 ұйым, соның ішінде стоматологиялық клиникалар медициналық қызмет көрсету құқығынан айырылды.

"Бұл жұмыс пациенттердің қауіпсіздігін қамтамасыз етуге, лицензиялық талаптардың сақталуын бақылауға және медициналық қызмет көрсетушілердің жауапкершілігін арттыруға бағытталған", - деп атап өтті Денсаулық сақтау министрлігі.

Ақпаратта клиникалар нақты қандай талаптарды бұзғаны айтылмаған.

Бұған дейін Алматыдағы стоматологиялық клиникаларда тексеріс жүргізілген болатын. Мекемелердің жартысынан көбіне қатысты әкімшілік хаттама толтырылып, кейбірінің лицензиясы кері қайтарылды немесе қолданылуы тоқтатылды.

Тағы оқыңыз: Қазақстанда тексерулерден кейін жүздеген жеке емшара кабинеттері жабылды