Денсаулық сақтау министрлігі Қазақстанда маймыл шешегінің таралу қаупін бағалады

Фото:depositphotos.com

Санкт-Петербургте бес адам маймыл шешегін жұқтырған болуы мүмкін деген күдікпен ауруханаға жатқызылды. Осы хабарламалар аясында Денсаулық сақтау министрлігі елімізге инфекцияның келу мүмкіндігін жоққа шығармайтынын, бірақ оның халық арасында жаппай таралу қаупі төмен екенін мәлімдеді, деп хабарлайды Tengri Health ведомствоның баспасөз қызметіне сілтеме жасап.

Жағдай туралы не белгілі?

Қазақстанның Денсаулық сақтау министрлігі әлемдегі эпидемиологиялық жағдайды, соның ішінде маймыл шешегінің таралуын бақылауды жалғастырып жатқанын хабарлады.

Анықтама: Маймыл шешегі - ортопоксвирустар тегіне жататын MPXV вирусы тудыратын инфекциялық ауру. Ауру адамнан адамға, жануардан адамға, сондай-ақ вирус жұққан заттар арқылы берілуі мүмкін.

"Әлемнің жекелеген елдерінде ауру жағдайларының тіркелуіне байланысты және белсенді халықаралық көлік байланыстарын ескере отырып, инфекцияның Қазақстан аумағына келу ықтималдығы жоққа шығарылмайды", - деп хабарлады министрлік.

Дегенмен, вирустың берілу ерекшеліктерін ескере отырып, мамандар Қазақстан халқы арасында инфекцияның кең таралу қаупін төмен деп бағалайды.

Қазақстан инфекцияға қалай дайындалып жатыр?

Елімізде инфекцияның алдын алу және оның таралуына жол бермеу мақсатында санитарлық-эпидемиологиялық қауіпсіздік шаралары қабылданып жатыр:

мемлекеттік шекара арқылы өткізу пункттерінде санитарлық-карантиндік бақылау күшейтілді;
ауру жағдайлары тіркелген елдердегі эпидемиологиялық жағдай қадағаланып, сол жақтан келген азаматтардың денсаулық жағдайы бақыланып жатыр;
барлық өткізу пункті мен санитарлық-карантиндік пункттер жанасусыз термометрлермен жабдықталды;
медициналық ұйымдар мен зертханалар инфекцияны дер кезінде анықтауға және диагностикалауға дайындалып жатыр;
аса қауіпті инфекцияларға күдік туындаған жағдайда ведомстволар арасындағы хабардар ету мен өзара іс-қимылдың бекітілген алгоритмдері жұмыс істеп тұр.

Министрліктің мәліметінше, көліктің барлық түрлерінде санитарлық-карантиндік бақылау кезінде аса қауіпті инфекция жұқтырған немесе оған күдікті адамдар анықталған жоқ.

"Эпидемиологиялық жағынан ерекше назар аударуды қажет ететін елдердің тізімі әлемдегі жағдайдың дамуына байланысты жүйелі түрде жаңартылып отырады".

Маймыл шешегі қалай беріледі және оның белгілері қандай?

Денсаулық сақтау министрлігі мамандарының айтуынша, инфекция негізінен ауру адаммен тығыз физикалық байланыста болғанда, соның ішінде тері бөртпелеріне және биологиялық сұйықтықтарға жанасқанда беріледі.

Сондай-ақ мыналар арқылы да жұқтыру мүмкін:

ластанған киім,
төсек-орын жабдықтары,
инфекция жұқтырған жануарлармен жанасу.

Маймыл шешегінің негізгі белгілеріне мыналар жатады:

дене қызуының көтерілуі,
бас ауруы,
бұлшықет ауруы,
лимфа түйіндерінің ісуі,
терідегі бөртпелер.

Инфекциядан қалай қорғануға болады?

Профилактика мақсатында министрлік мыналарды ұсынады:

шығу тегі белгісіз тері бөртпелері немесе инфекцияның басқа да белгілері бар адамдармен тығыз физикалық байланыста болмау;
жеке гигиена ережелерін сақтау;
басқа адамдардың жеке заттарын, киімін және төсек-орын жабдықтарын пайдаланбау, әсіресе адамда инфекцияға күдік болған жағдайда;
тән белгілер пайда болған жағдайда дәрігерге көріну.

"Бұл, әсіресе, ауру жағдайлары анықталған елге барғаннан кейін өте маңызды. Дәрігердің қабылдауында сапарлар мен ауру жұқтырған адамдармен болуы мүмкін байланыстар туралы хабарлау қажет", - деп еске салды мамандар.

Естеріңізге сала кетейік, бірнеше күн бұрын БАҚ Санкт-Петербургте бес адам маймыл шешегін жұқтыруы мүмкін деген күдікпен ауруханаға жатқызылып, медициналық бақылауға алынғанын хабарлады.

Роспотребнадзордың Санкт-Петербург және Ленинград облысы бойынша өңіраралық басқармасы мамандардың эпидемиологиялық тергеуді бастағанын хабарлады. Олар қарым-қатынаста болған адамдардың шеңберін анықтап, дезинфекция жұмыстарын ұйымдастырып жатыр.

Бізді Google-дың негізгі дереккөздер тізіміне қосыңыз

Қосу

Денсаулық сақтау министрлігі маймыл шешегі Ресей Қазақстан Денсаулық

“Елге әкелінуі жоққа шығарылмайды“: Денсаумин Қазақстанда маймыл шешегінің таралу қаупін бағалады

Жағдай туралы не белгілі?

Қазақстан инфекцияға қалай дайындалып жатыр?

Маймыл шешегі қалай беріледі және оның белгілері қандай?

Инфекциядан қалай қорғануға болады?