Бір қабылдау барысында қандай қызметтер алуға болады? ДСМ жаңа ереже ұсынды

Фото © Tengrinews.kz / Болат Айтмолда

Денсаулық сақтау министрлігі амбулаториялық көмек көрсету қағидаларына өзгеріс енгізуді көздейтін бұйрық жобасын әзірледі. Маңызды өзгерістің бірі тексерулер қолжетімділігіне қатысты. Көрсетілім болған жағдайда пациенттің жағдайын ескере отырып кеңейтуге болатын медициналық қызметтердің ең төменгі тізбесін бекіту ұсынылып отыр, деп хабарлайды Tengri Health.

Мәселе қандай құжатқа қатысты болып отыр?

"Ашық НҚА" сайтында "Амбулаториялық жағдайларда, яғни емханада мамандандырылған медициналық көмек көрсету қағидаларын бекіту туралы" бұйрық жобасы жарияланды.

Жарнама
Жарнама

Жобаға сәйкес, бір қабылдау барысында дәрігер тексеру жүргізіп қана қоймай, медициналық көрсетілімдер болған жағдайда рецепт жазып, анықтама рәсімдей алады, сондай-ақ профилактикалық қызметтер көрсете алады.

"Егер пациент басқа созылмалы ауру бойынша жоспарлы динамикалық байқаудан бір мезгілде өтіп жүрсе, тиісті іс-шаралардың нәтижесі жеке қабылдауды ресімдемей-ақ ағымдағы қабылдау аясында ескерілуі мүмкін", - делінген құжатта.

Тағы бір маңызды өзгеріс тексерулер қолжетімділігіне қатысты.

Медициналық көрсетілімдер болған жағдайда пациенттің денсаулық жағдайын ескере отырып, кеңейтілуі мүмкін медициналық қызметтердің ең төменгі тізбесін бекіту ұсынылады.

"Күрделі клиникалық жағдайларда қосымша тексерулерді мамандар тобының шешімі бойынша, медициналық құжаттамада тиісті негіздеме көрсете отырып тағайындау көзделеді", - деп атап өтті бұйрық авторлары.

Диагностиканың қандай түрлері пайда болмақ?

Бұйрық жобасы сипаттамасына сәйкес, В және С вирустық гепатиттерін диагностикалау мүмкіндіктерін, оның ішінде экспресс-әдістерді қолдануды кеңейту жоспарланған.

Сондай-ақ қан ұю жүйесінің бұзылуы мен жүйке-бұлшықет жүйесі ауруларын қоса алғанда, жекелеген созылмалы аурулары бар пациенттер үшін МӘМС шеңберінде жүргізілетін тексерулер тізбелері нақтыланады. Барлық қосымша зерттеуді дәрігер медициналық көрсетілімдерді ескере отырып тағайындайды.

Дәрігерлердің жұмысы да жеңілдейді. Қабылдау туралы мәліметтердің бір бөлігі, оның ішінде көрсетілген қызметтер мен жазылған рецепттер медициналық ақпараттық жүйелерде автоматты түрде есепке алынатыны жоспарланып отыр. Бұл құжаттарды қолмен толтыру көлемін азайтып, пациенттерге көбірек уақыт бөлуге мүмкіндік береді.

Бұдан басқа жоба тегін медициналық көмектің кепілдік берілген көлемі (ТМККК) және міндетті әлеуметтік медициналық сақтандыру (МӘМС) шеңберінде көрсетілетін амбулаториялық қызметтер тізбесін жеке бекітуді көздейді. Бұл қажетті медициналық көмек қай пакет шеңберінде көрсетілетінін нақты айқындауға мүмкіндік береді.

Бұған дейін Қазақстанда жедел жәрдем жұмысының ережелері жаңартылғаны хабарланған болатын.

Бізді Google-дың негізгі дереккөздер тізіміне қосыңыз
Қосу