Әлеуметтік медициналық сақтандыру қорына "Халықтық бақылау" сервисі арқылы (ӘМСҚ) 6,3 мың өтініш түсті. Соның 99 пайызында қазақстандықтар көрсетілмеген медициналық қызметтерді көрсетілді деп тіркеп қойғанына шағымданған. Мұндай шағымдар қалай тексерілетінін Tengri Health анықтап көрді.
Көрсетілмеген қызметтерге қатысты қанша шағым түсті?
ӘМСҚ мәліметінше, eGov mobile қосымшасындағы "Денсаулық" – "Медициналық қызметтерді алу тарихы" бөлімінде көрсетілмеген медициналық көмек туралы ақпаратпен танысу мүмкіндігі пайда болды. Онда мынадай мәліметтер көрсетіледі:
- қызметтің атауы,
- көрсетілген күні мен уақыты,
- қаржыландыру көзі.
eGov mobile-дағы "Халықтық бақылау" цифрлық сервисі арқылы азаматтардан 6,3 мың өтініш түскен.
Пациенттер қандай қызметтер негізсіз жазылғанына шағымданады?
Әлеуметтік медициналық сақтандыру қорының өкілдері біздің сауалға берген жауапта азаматтар көбіне медициналық қызметтер негізсіз жазылғанына шағымданатынын айтты.
"Азаматтардың 99 пайызы медициналық қызметтер тарихындағы мәліметтер мен нақты алынған медициналық көмек арасындағы сәйкессіздіктер туралы хабарлайды. Көбіне өтініштер бейінді мамандардың консультациясына қатысты болады, өтініш берушілердің айтуынша, олар мұндай қызметті мүлдем алмаған", - делінген жауапта.
Қор өкілдері бұл барлық жағдайда қызметтер негізсіз жазылғанын білдірмейтінін, ақпарат әлі де тексерілетінін нақтылады.
"Өтініштердің басым бөлігі медициналық ұйымдар төлемге әлі ұсынбаған кезеңге қатысты. Олар бойынша жоспардан тыс мониторинг жүргізіледі", - деп түсіндірді ӘМСҚ өкілдері.
Расталмаған деректер бойынша төлем жасалмайды. Қаржыны негізсіз алған медициналық ұйымдарға айыппұл салынады.
Бұған дейін Астанада жеке емхана иесі міндетті әлеуметтік медициналық сақтандыру жүйесінен ақша жымқыру ісі бойынша бес жылға бас бостандығынан айырылғаны хабарланған болатын.
Астана қаласының қылмыстық істер жөніндегі ауданаралық сотының үкімінде 2023 жылғы сәуір-тамыз аралығында елордалық емханалар бірінің басшысы сыбайласымен бірге медициналық сақтандыру қорынан ақшаны заңсыз алғаны айтылған.
Схема екі негізгі қадамнан тұрған: алдымен емханаға жоқ пациенттерді "тіркеген", кейін оларға жалған медициналық қызметтер рәсімдеп, сол арқылы ӘМСҚ-дан ақша алып отырған.