Атырау облысында ауруханаға ауыр халде түскен бір жасар бала қайтыс болды. Әлеуметтік желіде сәби қызылша жұқтырған болуы мүмкін екені және ата-анасы вакциналаудан бас тартқаны туралы ақпарат тарады. Денсаулық сақтау басқармасы баланың өлімін растады, алайда қызылша диагнозы әзірге нақтыланған жоқ, деп хабарлайды TengriHealth.
Ресми мәліметке сәйкес, 14 қарашада бала Жылыой ауданынан санитарлық авиациямен Атырау облыстық инфекциялық ауруханасына жеткізілген. Бұған дейін ол аудандық ауруханада ем қабылдаған.
Ауруханаға жатқызылған кезде сәбидің жағдайы өте ауыр деп бағаланды. Негізгі ауру салдарынан екі жақты пневмония, тыныс алу және жүрек жеткіліксіздігі пайда болған.
"Медицина мамандары қарқынды терапияның толық кешенін жүргізді. Көмек көрсетілгеніне қарамастан, баланы аман алып қалу мүмкін болмады", - деп хабарлады Атырау облысының денсаулық сақтау басқармасы Tengrinews.kz тілшісіне.
Эпидемиологиялық жағдай
Атырау облысы денсаулық сақтау басқармасының мәліметінше, 2026 жылғы 1 қазан мен 17 қараша аралығында өңірде қызылшаның зертханалық расталған 45 жағдайы тіркелді. Былтырғы сәйкес кезеңде 78 жағдай анықталған болатын.
Қазір стационарлық емде қызылша болуы мүмкін және инфекция расталған жеті пациент жатыр. Олардың төртеуінде диагноз зертханалық түрде расталған, тағы үш жағдайда күдік бар.
Денсаулық сақтау басқармасының дерегі бойынша, ауруханаға түскен пациенттердің басым бөлігі қызылшаға қарсы егілмеген.
Тіркелген жағдайлар саны былтырғы сәйкес кезеңмен салыстырғанда төмендегеніне қарамастан, дәрігерлер қырағылық танытып, алдын алу шараларын сақтауға шақырады. Вакциналау - қызылша мен асқынуларынан қорғанудың ең тиімді жолы болып отыр.
АҚШ-та қызылша бойынша рекорд деңгей тіркелді. Қазақстанда не болып жатыр?
Айта кетейік, қарашаның басында әлемдік БАҚ АҚШ-та жыл басынан бері қызылшаның бес мыңнан аса жағдайы тіркелгенін, бұл кейінгі 35 жылдағы ең жоғары көрсеткіш екенін хабарлаған еді. Қазақстандағы жағдай қандай екенін және аурудың көбейген-көбеймегенін мамандардан сұрап білдік. Денсаулық сақтау министрлігінің Санитарлық-эпидемиологиялық бақылау комитеті 2026 жылғы 9 айда 7 333 сырқаттану жағдайы тіркелгенін айтты.
Балабақша барған бала қайта-қайта ауыра берсе, алаңдауға негіз бар ма? Дәрігер түсіндірді
Неге балалар балабақшаға барған бірінші жылы жиі ауырады, асқынуды қалай байқауға болады және қосымша тексеруден қашан өткен жөн. Толығырақ мына материалдан оқыңыз.