Алматыда перзентхананың жаңа корпусы салынып жатыр, ол ашылғаннан кейін қазіргіден екі есе көп босанушыны қабылдай алады. Жаңа ғимарат қай жерде бой көтеретінін және пациенттерді қашан қабылдай бастайтынын қалалық денсаулық сақтау басқармасының өкілдері айтып берді, деп хабарлайды Tengri Health.
Жаңа корпус қашан және қай жерде ашылады?
Алматы денсаулық сақтау басқармасы баспасөз қызметінің мәліметінше, сөз Сейфуллин және Бөгенбай батыр көшелері қиылысында орналасқан №1 перзентхана жаңа корпусының құрылысы туралы болып отыр.
Қазір құрылыс алаңында монолит жұмыстары аяқталып, қабырғасы тұрғызылу үстінде және Бөгенбай батыр көшесі жағынан инженерлік желілер монтаждалып жатыр.
"Құрылыс бекітілген кестеге сай жүріп жатыр. 2027 жылдың көктемінде жұмысты аяқтап, корпусты пайдалануға беру жоспарланған", - деп хабарлады баспасөз қызметі.
Жаңа перзентхана қандай болмақ?
Ведомство мәліметінше, жаңа корпустың ауданы 10 458 шаршы метр болады. Ғимарат үш қабатты, сондай-ақ жертөле және техникалық қабаттары болады. Жоба бойынша 155 төсек-орын қарастырылған.
Қоғамдық денсаулық сақтау басқармасы жобалаушылар босануға көмек көрсетуді ұйымдастырудың заманауи талаптарын ескергенін атап өтті. Жаңа палаталарда аналар мен жаңа туған нәрестелерге жайлы жағдай жасалады.
"Жаңа корпус ашылғаннан кейін перзентхана жылына 5 мыңның орнына, 9 мыңға дейін босанушыны қабылдай алады", - делінген хабарламада.
Хирургиялық көмек көрсету жүйесі де өзгереді. Қабылдау бөлімінде шұғыл ота жасау бөлмесі жабдықталады, ал ота жасау бөлмелерінің жалпы саны екіден төртке дейін артады.
Ведомство ақпаратынша, бұл шұғыл араласуды қажет ететін жүкті әйелдер мен босанушыларға хирургиялық көмекті тезірек көрсетуге мүмкіндік береді.
№ 1 перзентхана жаңа корпусы эскизінің скриншоты / Видео: Алматы қалалық денсаулық сақтау басқармасының баспасөз қызметі
Ескі ғимарат неге бұзылды?
Алматы денсаулық сақтау басқармасы баспасөз қызметінің мәліметінше, жаңа корпус 1938 жылы салынған перзентхана ескі ғимаратының орнын басады. Оның ауданы 3 347 шаршы метр болған.
"Ол тіреуіш конструкциялары мен инженерлік желілерінің төтенше жағдайына, өрт қауіпсіздігі, желдету және инфекциялық бақылау талаптарына сәйкес келмеуіне, сондай-ақ лифтілердің болмауына байланысты бұзылды", - делінген хабарламада.
Тағы бір мәселе - нысанның тектоникалық жарық аймағында орналасуы болды. Ғимарат қазіргі сейсмикалық нормаларға сай келмеді.
"ҚазҚСҒЗИ қорытындысына сәйкес, ғимаратты нығайту және күрделі жөндеуден өткізу мүмкін емес әрі экономикалық тұрғыдан тиімсіз болды", - деп түсіндірді ведомство өкілдері.
Еске сала кетейік, Астана әкімі Жеңіс Қасымбек алдағы үш жылда қалада 10 денсаулық сақтау нысанын салу жоспарланғанын, оның ішінде екі перинаталдық орталық, жаңа заманауи көпбейінді аурухана, бес емхана және екі жедел жәрдем қосалқы станциясы бар екенін айтқан болатын.
Тағы оқыңыз: Қазақстанға қайтарылған активтер есебінен салынған ауруханалар қандай - шолу
Қазақстан медицинасы онлайнға көшіп жатыр: емделушілерге енді не қолжетімді?
