Әлемде коронавирустың жаңа нұсқасы анықталып жатыр: ол кімдерге қауіпті, Қазақстанда тіркелді ме?

Коронавирустың жаңа нұсқасы туралы не белгілі?

Қазанда неміс ғалымдары жариялаған зерттеуде коронавирустың жаңа нұсқасы - PJ.2.1-дің таралуы туралы айтылған. Ол алғаш рет 2026 жылдың мамырында Канадада табылды. Содан бері PJ.2.1 АҚШ пен Испанияда да тіркелді.

"Бұл нұсқа көбінесе 60 жастан асқан адамдарда анықталады. Мұндай үрдіс коронавирустың басқа да көптеген желісіне тән", - деп атап өтті ғалымдар.

Сарапшылардың пікірінше, халықаралық сапарларға байланысты жаңа штаммның әрі қарай таралу қаупі бар.

Бұл ретте PJ.2.1 нұсқасының коронавирустың жақында анықталған басқа нұсқаларымен салыстырғанда аурудың ауыр түрін тудыратынын көрсететін жарияланған клиникалық деректер әзірге жоқ, деп жазады РИА Новости.

Жаңа нұсқа COVID-19-дың кезекті толқынын тудыруы мүмкін бе?

Жаңа нұсқа қаншалықты қауіпті екенін және оның басым штаммға айналу мүмкіндігін анықтау үшін біз Қазақстан Денсаулық сақтау министрлігінің баспасөз қызметіне хабарластық.

Министрлік мұндай болжам жасау әлі ерте деп санайды:

"Жаңа генетикалық желінің пайда болуы пандемияның жаңа толқыны басталғанын білдірмейді. Бүгінде оның әрі қарай таралуы мен басымдыққа ие болуын болжау әлі ерте".

Денсаулық сақтау министрлігінің баспасөз қызметі мамандар жаңа нұсқалардың қауіптілігін бірнеше көрсеткіш бойынша бағалайтынын түсіндірді:

• аурудың ауырлығы;
• ауруханаға жатқызу және өлім-жітім саны;
• вирустың қалыптасқан иммунитетті айналып өту қабілеті;
• қолданыстағы алдын алу шараларының тиімділігі.

"Генетикалық тұрғыдан жаңа нұсқаның пайда болуы оның ауруды ауыр өткізуге себеп болатынын немесе халыққа жоғары қауіп төндіретінін білдірмейді", - деп атап өтті мамандар.

Қазір Қазақстанда коронавирустың қай нұсқалары таралып жатыр?

Кейінгі геномдық мониторинг деректері бойынша, Қазақстанда қазір Omicron нұсқасына жататын екі желі басым: XFG және JN.1.

Зерттелген сынамалардың 68,7 пайызын RV.1.1 деп аталатын XFG түрі, тағы 25 пайызын XFG.3 түрі құрады.

Қалған 6,3 пайызы JN.1 желісі мен оның RF.5.3 түріне тиесілі болды.

"Бұл вирустардың айналымы халықтың денсаулығына қосымша қауіп тудырмайды", - деп атап өтті Денсаулық сақтау министрлігінің баспасөз қызметі.

Әлемде талқыланып жатқан жаңа PJ.2.1 нұсқасы Қазақстанда зерттелген сынамалар арасында әзірге анықталған жоқ.

Денсаулық сақтау министрлігі COVID-19 сырқаттанушылығын және SARS-CoV-2 коронавирусының генетикалық өзгерістерін бақылауды жалғастырып жатқанын хабарлады.

Қазақстандықтарға респираторлық инфекциялардың алдын алудың әдеттегі шараларын сақтау ұсынылады. Ауру белгілері пайда болған жағдайда өзге адамдармен қарым-қатынасты шектеп, уақтылы медициналық көмекке жүгіну қажет.

2026 жылдың сәуірінде ғылыми ортада сол кезде 30-дан аса елде анықталған коронавирустың тағы бір жаңа BA.3.2 нұсқасы талқыланған болатын

Тағы оқыңыз: Таиландта COVID-19-дың жаңа толқыны басталғаны рас па: қазақстандықтар нені білуі керек?