Жақында Ақтөбеде медицина саласына 40 жылдан астам уақытын арнаған белгілі дәрігердің аса ірі мөлшерде алаяқтық жасағаны үшін бес жылға шартты түрде бас бостандығынан айырылғаны туралы ақпарат пайда болды. Сөз №3 қалалық емхананың бұрынғы бас дәрігері Жанвек Нармұхамедов туралы болып отыр. Tengri Health тілшісі "Сот кабинетінен" үкімді тауып, істің мән-жайын білді.
Схема қалай жұмыс істеді?
Іс материалдарына сәйкес, 2020-2025 жылдар аралығында "Медина Клиник" жекеменшік медициналық ұйымы Әлеуметтік медициналық сақтандыру қорының (ӘМСҚ) Ақтөбе филиалымен әріптестік орнатқан.
Медициналық мекеме алғашқы медициналық-санитарлық, консультациялық-диагностикалық көмек көрсетіп, пациенттерге профилактикалық тексерулер жүргізген.
Қор бұл қызметтер үшін тегін медициналық көмектің кепілдік берілген көлемі (ТМККК) және міндетті әлеуметтік медициналық сақтандыру (МӘМС) жүйесі аясында ақы төлеп отырған.
Тергеу нұсқасы бойынша, Жанвек Нармұхамедов іс жүзінде пациенттерге көрсетілмеген немесе есепте бұрын көрсетілген медициналық қызметтер үшін ӘМСҚ-дан ақша алып отырған.
Ол үшін ер адам басқа медициналық ұйымдардың жолдамасымен "Медина Клиникке" медициналық көмекке жүгінген ақтөбеліктердің деректерін пайдаланған.
Нармұхамедов олардың бұған дейін қандай қызметтер алғанын қадағалап, кейін оларды клиника есептілігіне қосымша қызмет ретінде қайтара енгізген. Олардың қатарында тексерулер мен консультациялар болған.
Мәліметтер цифрлық жүйе арқылы ӘМСҚ-ға беріліп отырған. Содан кейін қор Нармұхамедовтың есепте көрсеткен қызметтері үшін ақша аударған.
Үкімде дәрігердің клиниканы туысына сенімгерлік басқаруға бергені айтылған. Ұйым директоры болып басқа әйел тағайындалған. Бірақ медициналық ұйымды іс жүзінде Нармұхамедовтың өзі басқарған.
Іс материалдарында екі әйел де оның жоспарларынан хабарсыз болғаны көрсетілген. Олар клиника жұмысын ұйымдастырумен айналысып, Жанвек Нармұхамедовке пациенттер туралы мәліметтерді беріп отырған.
Айта кетейік, есептілікте есімдері аталған басқа да дәрігерлер оның іс-әрекеттері мен клиника атынан ұсынған шоттары туралы білмеген.
Қордан қанша ақша аударылды?
Істе медициналық қызметтер үшін ақша алуға қатысты екі эпизод сипатталған.
Біріншісі 2020 жылдың қаңтары мен 2022 жылдың желтоқсаны аралығындағы кезеңге қатысты. Осы уақыт ішінде дәрігер үкімге сәйкес көрсетілген қызметтер туралы мәліметтерді 11 422 рет қайталап көрсеткен:
- 2020 жылы 7,8 миллион теңге сомасында 3 705 жағдай туралы сөз болса,
- 2021 жылы - 18,2 миллион теңгеге 7 389 жағдай,
- ал 2022 жылы - 990 мың теңгеге 328 жағдай тіркелген.
Осы эпизод бойынша қор клиникаға барлығы 27 миллион теңгеге жуық қаражат аударған. Сот актісінде Нармұхамедов ақшаны қолма-қол ақшаға айналдырып, өз қажеттіліктеріне жұмсағаны айтылған.
Екінші эпизод 2020 жылдың қаңтары мен 2025 жылдың желтоқсаны аралығындағы кезеңді қамтиды. Осы уақыт ішінде ол расталмаған 8 410 медициналық қызмет үшін 26,1 миллион теңге сомасына шот ұсынған.
Бұл ақшаны да қор клиниканың шотына аударған. Үкімге сәйкес, Нармұхамедов оларды қолма-қол ақшаға айналдырып, жеке мақсаттарына пайдаланған.
ӘМСҚ Ақтөбе филиалының жоспардан тыс тексеру мәліметтері бойынша, жалпы шығын көлемі 53 117 542 теңгені құраған.
Сот қандай жаза тағайындады?
Сотта дәрігер кінәсін толық мойындап, өкініш білдірді және келтірілген шығынды толық өтеді. Сот мұны жауаптылықты жеңілдететін мән-жайлар ретінде ескерді. Ауырлататын мән-жайлар анықталған жоқ.
Нәтижесінде Жанвек Нармұхамедов Қазақстан Қылмыстық кодексінің 190-бабы 4-бөлігінің 2-тармағы бойынша аса ірі мөлшерде алаяқтық жасағаны үшін кінәлі деп танылды.
Сот оған бес жылға бас бостандығынан айыру жазасын тағайындап, осы мерзімге медицина саласындағы қызметпен айналысуға тыйым салды.
Бұл ретте сот бас бостандығынан айыру жазасын шартты деп санауға қаулы етті. Жазаның бүкіл мерзіміне Нармұхамедовке пробациялық бақылау белгіленді.
Сонымен қатар сот оны Жәбірленушілерге өтемақы қорына 78 640 теңге төлеуге міндеттеді.
Үкімде егер Жанвек Нармұхамедов бұл талаптарды орындамаса немесе заңда қарастырылған қайталама бұзушылықтарға жол берсе, сот шартты түрде соттаудың күшін жойып, оны тағайындалған бас бостандығынан айыру жазасын өтеуге жіберуі мүмкін.
Үкім әлі заңды күшіне енген жоқ.
Бұған дейін біз Астанада болған ұқсас жағдай туралы хабарлаған болатынбыз. Жеке клиника иесі міндетті әлеуметтік медициналық сақтандыру (МӘМС) жүйесінен ақша жымқыру ісі бойынша бес жылға бас бостандығынан айырылған еді. Медициналық ұйымда "өлі жандардың" қалай пайда болғаны, олардың қалай "емделгені" және бұл схемаға тағы кімдердің қатысқаны туралы толығырақ осы жерден оқи аласыздар.
